Ha bidi bitutangila

Bindidi ba Dilua dia tshiakabidi dia Yezu-Kilisto, badi bikisha dituku dia Muanda mutekete, ne Bibakulula ditabuja diabo, badi bayisha mayisha a ntaku, adi masangisha ku mifundu ya mu Mukanda wa Nzambi mufiwu mashindamene, mayisha â adi mamba ba mu tshikoso ne meyi adi alonda â :


MUNTU WA KUMUDILU WA MU BUNZAMBI : TATU

Kudi amu Nzambi Umue, Muntu, Muikale Nyuma, Wa Bukole bonso, Udi miaba yonso, Udi Mumanya bionso, Kayi Mufukibua, Kena Ufua.

Meyi â adi asanganyibua mu : Ekesode 20 : 2, 3 ; Yeshaya 45 : 5-12, 18, 20-22 ; Yone 4 : 24 ; Misambu 139 : 1-12.

MUNTU MUIBIDI MU BUNZAMBI : YEZU-KILISTO

Yezu-Kilisto udi Muana wa Nzambi, Udi Nzambi mudifuke nkayandi, Muikala momumue ne Tatu Wa Tshiendelele. Kuhitshila mu Kilisto, bintu bionso biakafukibua. Mu kulama ngikadilu wandi wa Bu-Nzambi, Kilisto wakadiangatshila Bu-muntu, wakadienza mubidi ne kuikalangana ha buloba bu muntu, biabi kakadi ne bubi, wakavuijibua buetu tuetu tshilejelu. Wakafua bua mibi yetu ku mutshi mutshiamakane, kubishibua ku bafue ne kubandishibua kudi Tatu, kudiye katataka ne moyo bua kutuakuila.

Meyi â adi asanganyibua mu :Ebelu 1 : 1-3, 5 ; Kolosai 1 : 15-17 ; Matayo 1 : 18-23 ; Yone 1 : 14 ; 1Timote 2 : 5 ; 3 : 16 ; Ebelu 7 : 25 ; Yone 14 : 6 ; Bienzedi 4 : 12.

3. MUNTU MUISATU MU BUNZAMBI : NYUMA MUIMPE

Nyuma Muimpe Udi Muhinganyi ne Muleji mpala wa Kilisto ha buloba ne Udi biandi kabidi Nzambi mudifuke. Mu mudimu wa buhikudi, Udi muikale Ewu udi wakajilula. Bantu aba basatu, Nzambi (Tatu), Yezu-Kilisto (Muana), ne Nyuma Muimpe Badi benza BUNZAMBI.

Meyi â adi asanganyibua mu :Yone 3 : 5-8 ; 14 : 16, 26 ; 16 : 7, 13 ; 1Kolinto 2 : 10 : 11 ; 1Kolinto 13 : 13 ; Matayo 28 : 19.

MIFUNDU YA TSHIJILA

Mifundu ya tshijila idi Diyi dia Nzambi. Yakafidibua ku buenzeji bu Nzambi. Idi ne buakabuluibua kudi bantu mu disua dia Nzambi ne idi Diyi dinenehele dia ditabuja ne dia bulombodi buandi.

Meyi â adi asanganyibua mu :Yone 5 : 39 ; 2Petelo 1 : 19-21 ; 2Timote 3 : 15-17 ; Luka 11 : 28 ; 16 : 29, 31 ; Matayo 22 : 29 ; Yone 10 : 35.

MIKENJI DIKUMI

Mikenji dikumi ya mu Ekesode 20 : 1-17, idi tshiakuidi tshia Disua dia Nzambi, mikale ne malu adi muntu ne bua kuenzela Nzambi ne kuenzela muntu nandi. Mikenjikayena ifua,idi ikokesha bantu bonso ne mu bikondo bionso, mitambe mikenji yonso ya bantu. Dishiha dia umue wa mu mikenji tshidi bubi, ne difutu dia bubi ndufu. Katuena basungidibue mu kutumikila kua mikenji, kadi n’kuhitshila mu Kilisto, bua se kuhitshila mu bukole buandi, tudi mua kutumikila ne kunyema dihishibua.

Meyi â adi asanganyibua mu : Matayo 5 : 17-20 ; 7 : 21 ; 19 : 17 ; 22 : 36-40 ; Yone 2 : 3-6 ; 5 : 1- 3 ; Lomo 2 : 13 ; Yone 8 : 11 ; Ebelu 10 : 26.

Lecture conseillée : Patriarches et Prophètes, pp. 277-282 (Patriarch and Prophets, pp. 305-309)

NSABATU

Mukenji muinayi wa mu mikenji dikumi udi ulomba ditumikila dia dituku dia dikisha dia tshijila, tshivulukidi tshia bufuki, tshimanyinu tshia difukulula ne buhikudi ne dijidibua. Udi bulongolodi bua mu nyuma butekela ntendelelu ne kuyila. Meyi â adi asanganyibua mu :Genese 2 : 1-3 ; Ekesode 20 : 1-17 ; Yehezekele 20 : 12, 20 ; Yeshaya 58 : 13, 14 ; Mako 2 : 28 ; Ebelu 4 : 1-10. Ditumikila dilelela dia Nsabatu didi dilomba dimanyika dia mudimu onso ku dibuela dia diba miu disambombo (Vendredi) ne ku dibuela diadi mu dia muandamutekete (Samedi). Didilongolola bua Nsabatu didi ne bua kujika kumpala kua dibuela dia diba kayi muanji kutuadija. Lewitiki 23 : 32 ; Ekesode 16 : 22, 23 ; Luka 23 : 54 ; Mako 16 : 1. Bualu bua Kilisto ne Bapostolo bakatumikila Nsabatu, kuntuadijilu ne kunyima kua dihohedibua ne kujudibua kuandi ku bafue, Nsabatu udi ushala dituku dilelela dia dikisha. (Anania ne Paulo kabakadi mua kubadibua ne bualu kudi bena Yuda bu bobo kabayi batumikidi ba Nsabatu ba lulamatu).

Meyi â adi asanganyibua mu :Luka 23 : 56 ; Bienzedi 13 : 42, 44 ; 16 : 13 ; 17 : 2 ; 18 : 4 ; 22 : 12 ; 25 : 7-8.

DITUMIKILA DIA DITUKU DIA KUMUDILU, DIMANCHE

Dituku dia ku mudilu dia lumingu, didibo babikila matuku â ne dimanche, bikondo bishale diakadi ditekela ntendelelu wa Diba. Hakadi ekelezia wa bena Kilisto uya kule ne diyisha dia bapostolo, Nsabatu wa dituku dia muanda mutekete wakahingajibua kakese kakese kudi dituku dia ku mudilu. Dimanche, ne bilele bikuabo bia ba mpangano, diakitabujibua kudi ekelezia wa bena Kilisto. Ditumikila dia dimanche bu dituku dia dikisha kadiena mu Mukanda wa Nzambi.

Meyi â adi asanganyibua mu :Matayo 15 : 9, 13.

MIKENJI YA MU TSHITENDELELU

Mikenji ya mu tshitendelelu idi mu Dihungila Dikulu-kulu, mifundila bena Yuda, yakadi ileja Mashiya wakadi ne bua kulua. Yakadi ileja mudimu wa Kilisto ne biakadiyi ilomba biakajika ku mutshi mutshiamakane. Mikenji ya mu tshitendelelu mikala ne ma nsabatu a bibilu ne masankasanka a bena Yuda, kayena mua kubuejakajibua ne mikenji dikumi ne dituku dia Nsabatu dia mukenji muinayi.

Meyi â adi asanganyibua mu :Ebelu 10 : 1, 9-10 ; Kolosayi 2 : 14, 16 ; Galatia 4 : 10, 11.

NGASA NE MISHINDU YA KUMUPETA

Ngasa udi unvuija ne « diakalengele didi muntu uheta kayi mudikumbanyine ». Bua bubi, bukua bantu budi ne bua kukenga ne biheta bia lufu. Kadi, Nzambi wakaleja dinanga diandi mu kufila luhandu, kuhitshila ku lufu lua Kilisto, kudi muntu muena bubi udi kayi mumukumbanyine. Luhandu ludi lulua hadi muena bubi mulombodibue kudi Kilisto ku : (a) Diyi dia Nzambi, (b)Nyuma Muimpe, ne (c) mudimu wa Lumu Luimpe.

Meyi â adi asanganyibua mu :Lomo 10 : 13-18 ; Yone 14 : 26 ; 16 : 13 ; 2Kolinto 5 : 17-20 ; Bienzedi 2 : 38-42.

DILEDIBUA DIA TSHIAKABIDI

Bua kusungidibua ku bubi ne biheta biabu, muntu udi ne bua kuikala ne bualu buhitshisha mu diledibua dia tshiakabidi, mu dikudimuka dia moyo. Hadi muntu ukudimuna mutshima, unyingalala bua mibi yandi ne ulekela Nyuma Muimpe ukuata mudimu mu mutshima wandi, udi uheta dijinga ne disua dia Nzambi. Mukanda wa Nzambi udi ubikila bualu ebu buhitshisha ne : ‘Diledibua dia tshiakabidi’. Moyo muhia-muhia udi ulondangana udi mulamibue mu ditabuja dietu mu Kilisto-Yezu.

Meyi â adi asanganyibua mu : Matayo 1 : 21 ; Yone 3 : 3 ; Lomo 2 : 4 ; Yone 16 : 8 ; Bienzedi 2 : 37-38 ; 1Yone 2 : 3, 6 ; Yone 16 : 13 ; 1Petelo 1 : 22 ; Misambu 119 : 142 ; Yone 17 : 17 ; Galatia 2 : 20 ; Ebelu 12 : 2 ; Lomo 1 : 17 ; Filipoi 4 : 13.

DIBATIZA

Aba badi bahete mulongo wa dijingulula dia malu ne badi « baledibue tshiakabidi » badi ne bua kubatijibua mu dinyibua dia mu mayi mu dina dia Tatu, dia Muana ne dia Nyuma Muimpe. Etshi tshileja lufu, kujikibua ne kubishibua kua Yezu-Kilisto, nansha kabidi lufu lua ‘tshifukibua tshihia-tshihia’ bua kuikala ne moyo muhia-muhia mu Kilisto.

Meyi â adi asanganyibua mu : Bienzedi 2 : 38 ; Mako 16 : 16 ; Lomo 6 : 3-9 ; Kolosai 2 : 12.

DIOWESHANGANA DIA MAYI KU MAKASA

Dioweshangana dia mayi ku makasa didi tshienzedi tshia budihuekeshi tshidi tshidianjila kumpala kua mesa a Mukelenge. Bualu ebu buakajadikibua kudi Kilisto ne buheshibue kudi ekelezia wa bena Kilisto bua kuyisha didihuekesha, kuikala mu mulongo umue, dinanga dia bana ba muntu ne bobumue mu Kilisto. Bana betu balume ne bakaji badi ne bua kunvuangana kumpala kua tshibilu etshi.

Meyi â adi asanganyibua mu :Yone 13 : 1-17 ; Matayo 5 : 23-24.

MESA A MUKELENGE

Mu kuangata diampa kadiyi luevenyi ne nvinyo wakadi kayi mufukisha biakadi bileja mubidi ne mashi bia Yezu-Kilisto, muena kuitabuja udi uvuluka makenga andi ne lufu luandi. Diunvuija dia tshibilu etshi didi dileja ne tshidi ne bua kuenzeka amu mu bena kuitabuja mu bulongame ne buimpe bu mubidi wa Kilisto.

Meyi â adi asanganyibua mu : Matayo 26 : 26-28 ; 1Kolinto 10 : 16, 17 ; Luka 22 : 11 ; 1Kilonto 11 : 23-29.

TSHILUMBULUIDI TSHIA DIKEBULULA

Tshiprofete tshia matuku 2300 (bidimu 2300, bilondeshile Nomba 14 : 34 ne Yehezekele 4 : 6) tshia mu Danyele 8 : 14 tshiakajika mu 1844, tshikondo tshiakaya « Dilengeja dia tshitendelelu » anyi « tshilumbuluidi tshia dikebulula » kutuadija. Etshi tshidi tshifuanangane ne dikebulula dienzeka kumpala kua dihingana dia Kilisto, mikanda ya mu diulu, idi ne moyo wa bantu bonso bakamba ne badi bana ba Nzambi mu bihungu bionso. Tshiheta tshia dikebulula edi tshidi tshijadika nshikidilu wa musuka onso bua moyo wa tshiendelele anyi bua lufu lua tshiendelele.

Meyi â adi asanganyibua mu :Muambi 12 : 14 ; Danyele 7 : 9-10 ; Luka 20 : 35 ; Buakabuluibua 14 : 6, 7 ; 22 : 12.
Tshilumbuluidi etshi ntshiunvuija mu Matayo 22 : 11-14.

BULELELA BUA TSHIKONDO ETSHI

Bumanyishi bua banjelo basatu bua mu Buakabuluibua 14 : 6-12, busangisha ku bumanyishi bua Muanjelo mukuabo wa mu Buakabuluibua 18 : 1-4, budi bulelela bua tshikondo etshi. Bumanyishi ebu budi ne bua kulongolola tshisumbu tshia ha buatshi tshia bantu 144.000 bua dihingana dia tshiakabidi dia Kilisto.

Meyi â adi asanganyibua mu :Yehezekele 9 : 1-7 ; Buakabuluibua 7 : 1-4 ; 14 : 1-12 ; 18 : 1-4.

TSHIHEDI TSHIA TSHIPROFETE

Bilondeshela milayi ya Nzambi ya mu Bienzedi 2 : 17-21, tshihedi tshia tshiprofete tshiakafidibua kudi ekelezia wa Kilisto mu matuku a ku nshikidilu, k embu muhinganyi anyi disangisha ku Mukanda wa Nzambi, kadi bu mulombodi ne tshimanyinu tshidi tshitahulula bantu ba Nzambi. Mifundu ya tshijila idi ikoka ntema yetu ku mikenji ya mu Mukanda wa Nzambi, mu bu mukenji wa ditabuja ne tshienzedi. Mifundu eyi idi itukuba ku diunvuija dikonyangale dia Diyi dia Nzambi.

Meyi â adi asanganyibua mu :Nomba 12 : 6 ; 2Kulondolola 20 : 20 ; Nsumuinu 29 : 18 ; Oshea 12 : 14 ; Amose 3 : 7 ; Efeso 4 : 8-11 ; 1Tesalonike 5 : 20, 21.

DIBAKA

Dibaka diakajadikibua kudi Nzambi ne kunemekibua kudi Kilisto, bua kusangisha mulume ne mukaji bua moyo mujima. Nansha dishiha dia dibaka bua kuselulula, nansha kuenda kua masandi, nansha dibaka ne badi kabayi bena ditabuja kabiena mu mikenji ya mu diulu ya dibaka nansha.

Meyi â adi asanganyibua mu : Luka 16 : 18 ; Lomo 7 : 1-3 ; 1Kolinto 7 : 11, 39 ; 2Kolinto 6 : 14.

DIBAKULULA MU BUKOLE BUA MUBIDI NE MU NVUADILU

Bu mudi mubidi wa muena Kilisto muikale ntempelo wa Nyuma Muimpe, muena kuitabuja udi ne bua kulama bukole buandi bua mubidi mu kulonda mikenji ya bufuki, idi ibenga ndilu yonso udi ushiha bukole bua mubidi ne bibidilu bia moyo munyanguke, mu kuikala mukelemesha ndilu wa bintu bimpe. 1Kolinto 3 : 16, 17 ; Filipoi 4 : 5 (mu Anglais ‘kukelemesha’ ke ‘lutulu’, nansha, NdT).
Bilele bia nvuadilu bidi bileja tshidi ngikadilu muikale. Buhuekele bua buena Kilisto ne kanemu ka muntu nkayandi bidi bilomba bua tuetue kubenga mushindu wa dilelekesha dia malu a ha buloba.

Meyi â adi asanganyibua mu:1Petelo 3 : 1-5 ; Efeso 3 : 16-24 ; 1Kolinto 11 : 15 ; 1Timote 2 : 9

NGIKADILU WETU KUMPALA KUA BULOMBODI BUA MBULAMATADI

Muena Kilisto udi muenzejibue bua kunemeka bukokeshi bua mu diulu ne bua bantu. Udi utumikila ne moyo mujima ku mikenji yonso miakane ya mbulamatadi. Bu bikala menzejibua a mikenji abuela mu dihanga kuhetangana ne mikenji ya Nzambi, muena Kilisto udi ne bua kuangata dihangadika mu yeye nkayandi : ‘Ndi ne bua kutumikila Nzambi anyi bantu ?’ Ne kabidi, kondo ka moyo wetu wa buena Kilisto kadi katukanda bua kubuelakana ne malu a bididi.

Meyi â adi asanganyibua mu: 1Petelo 2 : 17; Bienzedi 5 : 29; 2Kolinto 6 : 14-17; Yeshaya 8: 12

MUBIDI WA KILISTO, EKELEZIA WANDI

Ekelezia wa Kilisto udi tshihahu tshidi tshimueneka ne tshilongolola katshiyi tshia bantu bamuangalake. Ekelbezia udi ufila tshituha tshia bukokeshi buandi kudi balombodi basungula, ke mbua kulombolabo ekelezia, kadi bua kukuatshila mubidi wa Kilisto mudimu ne kuwudiundisha. Ekelezia udi ne bukokeshi bua kuakidila bantu kuhitshila ku dibatiza ne ku dijukula dia ditabuja, nunku ne bua kukosa malanda abo ne ekelezia bikalabio bikumbane.

Meyi â adi asanganyibua mu :Yone 10 : 16 ; 11 : 52 ; 1Kolinto 10 : 17 ; 12 : 12-27 ; 1Petelo 2 : 5 ; Efeso 4 : 15, 16 ; Kolosai 2 : 18, 19 ; Buakabuluibua 1 : 20 ; Musambu wa Solomo 6 : 10 ; Efeso 4 : 11-13 ; Bienzedi 6 : 1-6 ; 13 : 3 ; 20 : 28 ; 1Peteto 5 : 1-5 ; Matayo 16 : 19 ; 18 : 15-18 ; 1Kolinto 5 : 11, 13.

TSHIA DIKUMI NE MILAMBU

Kufila Tshia dikumi ne milambu bua kutua mpanda ku mudimu wa buambi ne diyisha dia Lumu Luimpe tshidi mudimu wa muena Kilisto.

Meyi â adi asanganyibua mu :Malaki 3 : 7-10 ; Matayo 23 : 23 ; 1Kolinto 9 : 14 ; 2Kolinto 9 : 6, 7 ; Ebelu 7 : 8.

DIHINGANA DIA TSHIAKABIDI DIA KILISTO

Tshikondo tshia ngasa bua bukua bantu tshidi tshijika amu kumpala kua dihingana dia tshiakabidi dia Kilisto, dienzeka amu mudidi, mu Yeye nkayandi, haoke tô, diunvuika ne dia buloba bujima.

Meyi â adi asanganyibua mu :Luka 13 : 23-25 ; 17 : 29-30. Yeshaya 11 : 4 ; 66 : 17 ; 2Tesalonike 1 : 6-10 ; Matayo 24 : 27, 31 ; Yone 14 : 1-3 ; Bienzedi 1 : 9-11 ; 1Tesalonike 4 : 15-17 ; Buakabuluibua 1 ; 7.

NGIKADILU WA MUNTU NE LUIDI LUA BAFUE

Muntu wakafukibua ku tshianza tshia Nzambi bu musuka udi ne moyo. Bua kuhanga kutumikila, wakatahuludibua ne mushimi wa moyo. Bu tshihea, udi muena lufu. Udi mua kuheta dibenga kufua kuhitshila mu Kilisto : Mulayi udi wa tshituha tshihi, kadi udi ûheta ku dilua dia tshiakabidi dia Yezu. Genese 2 : 7 ; 3 : 22-24 ; Yobo 4 : 17 ; 1Yone 2 : 25 ; Yone 11 : 25, 26 ; Lomo 2 : 7 ; 2Timote 1 : 10 ; 1Kolinto 15 : 53-54. Ku lufu, ne wakadi muena bubi anyi muena buimpe, muntu udi ubuela mu ‘Tulu’, luidi lua kayi wela menji, lua dihuwa, lua kakuyi dienza dia mudimu. Bafue badi bashala mu nkita yabo tô ne ku dibishibua dia bakane ne babi.
Bantu babi kabena mu muaba wa dikenga, kadi badi ‘balaminyina bua dituku dia dilumbuluisha, bua kunyokibua’. Bakane kabena mu diulu, kadi badi bashala mu nkita tô ne ku dituku dia dibishibua, ku dilua dia Kilisto.

Meyi â adi asanganyibua mu :Muambi 9 : 5-6, 10 ; Misambu 6 : 5 ; 146 : 4 ; 89 : 49 ; Buakabuluibua 20 : 13 ; 2Petelo 2 : 9 ; Yone 5 : 28-29 ; Danyele 12 : 13 ; Bienzedi 2 : 29, 34 ; 2Timote 4 : 7-8.

BIDIMU TSHINUNU

Hashishe, Kilisto mumana kulua tshia kabidi, nekuikala tshikondo tshia bidimu tshinunu, tshidibo babikila ne ‘Millenium’. Munda mua tshikondo etshi, ahu bakane nebikale mu diulu ne Kilisto, bantu babi nebashale mu dinfuenkenya dia buloba budi kabuyi ne muntu.
Mu tshikondo etshi, bakane nebalumbuluishe bantu babi. Ku nshikidilu kua bidimu tshinunu, bantu babi nebabishibue bua kuheta dikosa diabo dia tshilumbu ne kuikala babutudibue kudi kahia.

Meyi â adi asanganyibua mu :Yone 14 : 3 ; Buakabuluibua 7 : 9 ; 14 : 1 ; 20 : 4-5 ; Misambu 46 : 3, 9 ; Yeshaya 24 : 1-4 ; Yelemiya 4 : 23-27 ; 1Kolinto 6 : 2-3 ; Buakabuluibua 20 : 4 ; Yone 5 : 29 ; Buakabuluibua 20 : 5, 9, 14 ; Malaki 4 : 1, 3 ; Matayo 10 : 28 ; 2Petelo 3 : 7-10 ; Misambu 37 : 10.

BULOBA BUHIA-BUHIA

Hashishe, buloba bumane kulengeshibua ku bubi ne kahia, Nzambi neaya kuenzulula « Bintu bionso bihia-bihia », wenzulula buloba mu buimpe buabo – bua Edene. Buloba ebu buhia-buhia nebuvuijibue tshisombelu tshia tshiendelele bua bahikudibue, Nzambi neakokeshe ne bukokeshi bonso mu tshiendelele tshionso.

Meyi â adi asanganyibua mu :2Petelo 3 : 13 ; Buakabuluibua 21 : 1-7 ; Matayo 5 : 5 ; 1Kolinto 2 : 9.


« Tshitudi bitabuje » n’dimuangalaja dia Bibakuludi ba Dilua dia Yezu dia tshiakabidi, Bikishi ba dituku dia Muanda mutekete, Bibakuludi ba ditabuja.
Tshiena bualu tshia ntuadijilu ‘mu Anglais : ‘This we Believe’. Ne dianyisha dimpe dia ‘Seventh Day Adventist, Reform Movement, General Conference.

MBANGILU WA BINDIDI BA DILUA DIA TSHIA KABIDI DIA KILISTO, BIKISHI BA DITUKU DIA MUANDA MUTEKETE BIBAKULUDI BA DITABUJA

Katshia ku ntuadijilu, Bindidi ba Dilua dia Tshiakabidi dia Kilisto, Bikishi ba dituku dia mutekete bakamba hatoke luidi luabo : « Tuetu, batu bashala badisangishe kuhitshila mu tshienzedi etshi mu ekelezia, tudi tuangata dina dia Bindidi ba Dilua dia Tshiakabidi dia Kilisto, mu kudifila bua kulama mikenji ya Nzambi ne ditabuja dia Yezu. »1

Luidi lolu lumue luakajadikibua kudi Ekelezia wa Bindidi ba Dilua dia Tshiakabidi dia Kilisto, Bikishi ba Dituku dia Muanda mutekete ku Matunga Masanga munkatshi mua mvita ya buena ditunga. Bakajadika bualu ebu mu 1864.

« Dina dia buena Kilisto didi ne Bindidi ba Dilua dia Tshiakabidi dia Kilisto, Bikisha dituku dia Muanda mutekete, badi bangata Mukanda wa Nzambi bu mukenji wa ditabuja ne tshienzedi, badi bela menji hohamue ne mayisha a Mukanda wa Nzambi adi matahuluke ku nyuma ne tshienzedi tshia mvita. Ke bua tshinyi misangu yonso batu amu batontolola ku dituala dia bingoma. Bu bikalaku kudi muaba mu Mukanda wa Nzambi utudi mua kubala kutamba mikuabo yonso bu nshindamenu wa ditabuja dietu, udi Mikenji dikumi, itudi tubala bu ya ha mûlu, ne itudi tuangata umue ne umue wa mu meyi â manene mu luidi luawu lulelela ne lua mufundu.

Mukenji muinayi udi ulomba dilekela dia mudimu onso dituku dia muanda mutekete dia mu lumingu, mukenji muisambombo udi ukandika dishiha dia moyo, bubidi buayi buetu tuetu idi bualu bukole bua kukumbaja mudimu wa busalayi.
Tshienzedi tshietu tshidi misangu yonso mu diunvuangana ne meyi â manene. Nunku, bena kuitabuja kabena badiunvue mubudikadidi bua kubuela mu mudimu wa busalayi. Mu Mukanda nansha umue wa mifundu yetu katuena bele mukenji anyi batue dituala dia bingoma mpanda, ne hatuakabikidibua bua kuimana kuinshi kua dibendele, hamutu ha kushiha mikenji yetu, tuakadi ne disanka bua kufuta ne kuambuluishangana bua kufuta 300 dollards ya tshibawu. »2

Mu 1865, Conférence Générale wa Bindidi ba Dilua dia Kilisto, Bikishi ba Dituku dia Muanda Mutekete wakuya kujadikilula luidi luandi lua ntuadijilu : « Bu mudibio bijadika ne tudi bajadike ne bulombodi bua mbulamatadi bu mudibo buitabujibue kudi Nzambi bua kuteka bulongame, kulumbulula kuakane ne ditalala bikale bijadika mu ditunga, ne bantu ba Nzambi bikale ne moyo wa ditalala mu buimpe bonso ne bulelela, tudi bajadike ne tudi ne bua kufuta bitadi, bua kunemeka bilele bia mu ditunga, bua kunemeka ne kutshina bulombodi bua mbulamatadi, bu mudibio bifunda mu Dihungila Dihia-dihia. Nansha tudi tuhesha Kaîsa tshidi Mifundu yamba bu tshiandi ne disanka, tudi benzejibue bua kubenga dibuelakana dia mu malu a mvita ne dimatshisha dia mashi, bua kabiena bihetanga ne midimu idi mituhebua kudi Mukelenge wetu wa mu diulu bua bena lukuna betu ne bua bukua bantu bonso mu kabujima »3

Luidi elu lua ditumikila mu kabujima ku Mikenji ya Nzambi kaluakadi luteka mu tshienzedi mu mvita ya ku mudilu ya buloba bujima (1914-1918), lutatu lukole luakalua mu Ekelezia wa Bindidi ba Dilua dia Kilisto dia tshiakabidi, Bikishi ba Dituku dia muanda mutekete. Ahu bia ha lukama 98 bia bena kuitabuja bakangata dihangadika dia kutumikila ku mikenji ya balombodi ba Ekelezia mu kubuelakana mu mvita, bia ha lukama 2 kuangata dihangadika dia kushala bena lulamatu ku mikenji ya Nzambi, balama luidi lua ntuadijilu, luakayishibua ne luteka mu tshienzedi tô ne ku dituku edi. Bena kuitabuja balelela bakakuhuishibua mena ku mukanda wa ekelezia wa Bindidi ba Dilua dia tshiakabidi dia Kilisto, Bikisha Dituku dia Muanda mutekete mu matunga a mputu (Europe) bualu bua bakasungula bua kuakuila luidi lua ntuadijilu lua Ekelezia ha bualu bua ditumikila dia Mikenji ya Nzambi (umue ne umue wa mikenji Dikumi) […]

Ke bua bualu kayi, diba dia kuvulangana bungi buabo, Bindidi ba Dilua dia Kilisto dia tshiakabidi, Bikishi ba ba Dituku dia Muanda mutekete, Bibakuludi ba Ditabuja bakudilongolola mu Ekelezia, mutahuluke ne Bindidi ba Dilua dia tshiakabidi dia Kilisto, Bikishi ba mu dituku dia Muanda mutekete, tshikondo tshiakuya batumibue ba matunga mashilashilangane, kubangila mu dituku dia 14 tô ne dia 20/07/1925. Tshihatshila tshia Dibakulula dia Ditabuja mbua kutungunuka ne malongesha ne tshienzedi bia ntuadijilu bia Ekelezia wa Bindidi ba Dilua dia Tshiakabidi dia Kilisto, Bikisha Dituku dia Muanda mutekete. Mu Dibeji dimuangalaja kudi Conférence Générale wa Bindidi ba Dilua dia Tshiakabidi dia Kilisto dia mu matuku 13/05/1913, mu mabeji 33-34, E.G. White wakadi wamba ne :
“Nebikale bia mushinga bua tuetu kubala ne mushinga tshidi bua kufika katataka ha buloba. Kakuena tshikondo tshia kujimija bua malu adi kâyi ne dikuatshisha anyi dikeba dia masanka a muntu nkayandi. Bu bikala bikondo bitudi tuikalangana kabiena bikumbana bua tuetu kufila buenzeji ha nyuma – bitambe, tshidi mua kutulenga n’tshinyi ? Mifundu kayenaku itubikila ku mudimu mutambe buhuangane ne wa tshijila ha mutu ha utudi nawu tô ne katataka ?

Katataka tudi dijinga ne bantu badi ne kujingulula kua malu kutokesha. Nzambi udi ubikila aba badi ha buihi bua kudilekelela balombodibue kudi Nyuma Muimpe bua kuenza dibakulula didi ne ndondo. Ndi m’mona lutatu kumpala kuetu ne Mukelenge udi ubikila bena mudimu bandi bua kuikalabo ne luidi lujadika. Musuka onso udi ne bua kudifila kudi Nzambi mu kâbujima ne mu bulelela kutamba bidimu bikadi bihite … Nakalengibua bitambe ku malu akuhit matuku makese â ku mpala kuanyi mu butuku. Biakadi bimueneka dinyungakana dikole, mudimu wa dibakulula mu miaba mishilashilangane.
Bantu betu bakadi badisangishe, bitabuja ku dibikila dia Nzambi. Bana betu balume ne bakaji, Mukelenge udi utubikila. Katuena mua kuteleja diyi diandi anyi ? Katuena mua kutemeshilula minda yetu ne kuenza bu bantu badi bindila dilua dia Mukelenge wabo anyi ? Tshikondo tshietu tshidi tshitubikila bua kutuala munya, tshidi tshitusaka ku tshienzedi.”4

Conférence Générale wa Bindidi ba Dilua dia Kilisto dia tshiakabidi, Bikisha Dituku dia Muanda mutekete, Bibakulula ditabuja wakanji kutekibua ku Isernhagen, mu Allémagne, pashishe ku Bâle, mu Matunga masanga a Amelika, ne mu 1949 wakafundibua mu Mikanda ya Mbulamatadi ku Sancramento, mu Californie.

Biakamueneka bia mushinga bua mudimu wa buloba bujima bua kuanji kutuma bua tshikondo tshikese nzubu wa Midimu Ekelezia ku Blackwood, New Jersey, kumpala kua yeye kutekibua bua kashidi ku Roanoke, Virginie. Ekelezia wa Bindidi ba Dilua dia tshiakabidi dia Kilisto, Bikishi ba Dituku dia Muanda mutekete, Bibakulula Ditabuja ukadi mubuele mu matunga 114 ne bimenga.

Malu maheta mu:

1. J. Longhborough, the Great Second Advent Movement, p. 352
2. F.M. Wilcox, Seventh-Day Adventist in Time of War, p. 58
3. The Review and Herald, 23 Mai 1865
4. E.G.White, General Conference Bulletin of The Seventh-Day Adventists, May 13, 1913, pp. 33, 34

L'Union rassemble les missions de Kinshasa, Bandundu, Tshikapa, Kasaï Est, Katanga Sud, Kananga Est, Nord-Est/Kisangani, Tanganyika et Dekese,
et joue le rôle de coordinateur auprès de la Conférence Générale.

Président : Fr Jean Karim Kasonga
Mobile: +243 (0) 85 025 0003
+243 (0) 99 031 3149
e-mail: karimkasonga63@gmail.com
Facebook: jean.karim38@yahoo.fr

Vice-Peésident: Fr Timothée Kabamba
Mobile: +243 (0) 99 749 2517
+243 (0) 82 128 4572
e-mail: timkabamba@yahoo.fr

Sécretaire/Trésorier: Fr Pierre Kalonji Tshibuyi
Mobile: +243 (0) 81 564 3058
+243 (0) 85 921 6840

Département de Publication-Presse et Ecole du Sabbat
Fr Gordon Ngalamulume
Mobile: +243 (0) 81 899 6325
+243 (0) 99 988 3617
e-mail: gordonngalamulume@gmail.com
Facebook: gordon_ngakal@yahoo.fr
WhatsApp: +243 (0) 81 899 6325

Département des Activités Missionnaires
Fr Richard Tuakupeta Kayembe
Mobile: +243 (0) 97 208 5140

Département de la Jeunesse
Fr Augustin Ntumba Kalombayi
Mobile: +243 (0) 97 468 8870
+243 (0) 81 383 9070
e-mail: ntumbakaloma@yahoo.fr
Facebook: +243 99 744 3089

Département de la Santé
Fr Albert Kyembe Bwalya
Mobile: +243 (0) 99 560 6713
+243 (0) 81 054 1459
e-mail: albertkyembe@gmail.com
Facebook: albertkyem@yahoo.fr

Département de l'Education : Fr Charmy Besolo Baketo
Mobile: (+243) (0) 81 520 6174

Département de Colportage : Fr Moïse Pembe
Mobile: (+243) (0) 81 031 6088

Département de Bienfaisance: Soeur Clémentine Masanka
Mobile :

Département d'Audit : Fr Innocent Ngolo
Mobile: (+243) (0) 99 044 4597